GAIA MISIOA
Esne Bidearen mapa zehatzenak izar-lurrikarak eta izar ezezagunak erakusten ditu
AGENTZIAK | EITB MEDIA
Europako Espazio Agentziak Gaia Misioa abiatu zuen 2013an Esne Bidearen alderdi anitzeko mapa zehatzena eta osoena sortzeko.
ESAren mapetako bat. Argazkia: ESA/Gaia/DPAC, created by T.E.Dharmawardena
Esne Bidearen mapa zehatzenak astro ezezagunak, izar-lurrikarak eta galaxiako ia 2.000 milioi izarri buruzko datu hobetuak eskaintzen ditu, Gaia katalogoaren arabera.
Europako Espazio Agentziak 2013an abiatu zuen Gaia Misioa. Horren helburua da Esne Bidearen dimentsio anitzeko mapa zehatzena eta osoena sortzea. Mapa horrek astronomoei lagunduko die galaxiak milaka milioi urtean izan duen bilakaera berreraikitzen.
Orain arte jasotako izar bitarren, eguzki-sistemako milaka objekturen (hala nola asteroideen eta planeten ilargien) eta Esne Bidea galaxiatik kanpo kokatutako milioika galaxia eta quasarren inguruko datu-multzorik handiena biltzen du mapak.
Gainera, Gaia Misioak frogatu ahal izan du gure galaxiako izar batzuk funtsezko materialez eginak daudela eta, beste batzuk, Eguzkia, esaterako, aurreko izar-belaunaldiek aberastutako materiaz eginak daudela. Erdigunetik eta galaxiaren planotik hurbilen dauden izarrak metaletan aberatsagoak dira distantzia handiagora daudenak baino.
Izarren posizioen eta horien argi sakabanatuaren neurketa zehatzen bidez, izarren argiaren absortzioa mapatzea ahalbidetzen du Gaiak. Mapa horiek izar, galaxia eta Esne Bidearen historiaren mekanismo fisikoei buruzko funtsezko aztarnak ematen dituzte.