Langabezia % 11,9ra igo da urtarrilean, eurogunean

Urtarrilean berriz gora egin du langabeziak eurogunean, eta dagoeneko % 11,9ko langa gainditu du, Eurostaten emandako datuen arabera. Greziak du langabezia tasarik altuena, eta Espainia bigarrena da (% 26,2).

18.998 milioi pertsona ari ziren lan bila eurogunean urtarrilean, aurreko hilabetean baino 201.000 pertsona gehiago, eta 2012ko urtarrilean baino 1.909 milioi lagun gehiago.

Greziak (% 27), Espainiak (% 26,2) eta Portugalek (% 17,6) dituzte langabezia tasarik altuenak. Bestalde, baxuenak orain ere Austrian (% 4,9), Alemanian (% 5,3) eta Luxemburgon (% 5,3) dituzte.

Gizonen langabezia tasak hamarren bat egin du gora eurogunean % 11,8ra iritsi arte. Emakumeen langabeziak ere gora egin du, eta % 12,1ean kokatu da. Halaber, 25 urtetik beherakoen langabezia tasa % 24,2koa da orain.

Espainia da gizonezko langabe gehien dituen herrialdea, eta gazte eta emakume langabe gehien dituen bigarren herrialdea da, Greziaren atzetik. Gazteen artean langabezia tasa % 55,5ekoa da Espainian, eta emakumezkoen laurdena baino gehiago lanik gabe daude.