Jaurlaritzak dio 'pertsonen' aldeko apustua egin duela Aurrekontuetan

Ricardo Gatzagaetxebarria Ogasun eta Finantza sailburuaren ustez, 2013ko Aurrekontuek krisia gainditzen lagunduko dute, babes sozialean eta pertsonetan inbertitzea aurreikusten duelako.

Radio Euskadin egindako elkarrizketa batean azaldu duenez, Eusko Jaurlaritzak krisi ekonomikoari egin behar dio aurre, eta horretarako, herritarren babesaren aldeko apustua egin du, "horixe baita Jaurlaritzaren lehentasuna", Hezkuntzako, Osasuneko eta bazterketaren kontrako borrokaren kalitateari eustearekin batera.

Era berean, "modernizazioa" bilatuko duten neurriak ere hartuko omen dituzte, "giza kapitalean" inbertituz, "pertsonen trebakuntzan eta hezkuntza sistemaren kalidadean"."Babes sozialaren euskal ereduaren aldeko apustu egin behar da, eta herritarren trebakuntzan eta heziketan inbertitu", azpimarratu du Gatzagaetxebarriak; izan ere, "hor dago herri honen etorkizuna".

Akordioak

Ogasun eta Finantza sailburuak esan du ez dutela alderdirik lehenesten Aurrekontuak onartzeko akordioa lortzeko, eta irekita daudela gainerako alderdiek egiten dituzten proposamenak aztertzeko. Horren harira, Aurrekontuek "denok konpartitzen ditugun nahiak" barne hartzen dituztela eta horrek onarpena erraztu dezakeela iritzi dio.

Gatzagaetxebarriak azaldu duenez, Jaurlaritzak ezin du "bazkide bat aukeratu" Aurrekontuak onartzeko, bere ardura proiektua "denbora tarte errekorrean aurkeztea" zen.

"Hilabete eta hiru asteko tartean aurkeztu ditugu, eta orain, gogoeta egitea alderdi politikoei dagokie", gaineratu du.