Bisita ofiziala
Urkullu: 'Datozen bi urteak zailak eta gogorrak izango dira'
Erredakzioa
Lehendakariak bere lehen bisita ofiziala egin du Etxebarrin, Lantegi Batuaken tailerretan.
Your browser doesn’t support HTML5 video
Datozen bi urteak "gogorrak eta zailak" izango direla iritzi dio Iñigo Urkullu lehendakariak. Hala ere, Euskadik enpleguari "eutsi" egin behar diola gaineratu du, "berpizte ekonomikoa" lortu ahal izateko.
Gaurkoa, lehendakariaren lehen bisita ofiziala izan da. Urkullu Lantegi Batuaken tailerretan izan da, Etxebarrin. Urkullurekin batera, Jose Luis Bilbao Bizkaiko diputatu nagusia eta Juan Mari Aburto Enplegu sailburua izan dira.
Urkulluren hitzetan, Lantegi Batuakek bere Gobernu berriaren filosofiarekin "bat" egiten du. "Lantegi Batuakek eta Jaurlaritzak oinarri, baloro eta helburu berberak ditugu", gaineratu du.
Datozen bi urteak "gogorrak" izango direla berretsi du Urkulluk, baina mezu baikorra iragarri nahi izan du etorkizunari begira. Enplegurik ez suntsitzea, ez galtzea, izango da "krisialditik ateratzeko gakoa".
Lehendakariak Bizkaian urritasuna duten pertsonak laneratzeko eta gizarteratzeko lanean diharduen Lantegi Batuak erakundeko tailerra bisitatu du.
2013.ean, 30 urte beteko ditu Lantegi Batuakek. Bizkaian 2.500 pertsona baino gehiagori ematen die lana, eta horietatik 2.300ek urritasunen bat dute.