Emakume Nekazarien Estatutua aurkeztu du Eusko Jaurlaritzak

Eusko Jaurlaritzak diru-laguntzak eta esleipenak ematerako orduan lehentasuna emango die titulartasun partekatua duten nekazaritza ustiategiei, emakume baten izena tartean badago.

Halaxe zehazten du Arantza Tapia Ekonomiaren Garapen eta Lehiakortasun sailburuak Gobernu Kontseiluan aurkeztu duen Emakume Nekazarien Estatutuak.

Kontseiluaren ostean eskaini duen agerraldian, Tapiak azaldu du lege aurreproiektu horrek emakumeek nekazal munduan bizi duten diskriminazioa etetea duela helburu, batez ere, onarpen profesionalaren, estimu sozialaren eta eskubideen erabileraren arloetan.

Nekazal munduan emakumeen eta gizonezkoen arteko "tratu eta aukera berdintasuna" lortu ahal izateko, 2008ko Nekazal eta Elikagadura Politikaren Legea garatu duen arau "aitzindaria" aurkeztu du EAEko Gobernuak.

Titulartasun partekatua

Emakumeei protagonismoa emateko "ekintza positiboen" artean, nabarmentzekoa da titulartasun partekatua figura berriaren sorrera, "berdintasun eraginkorra lortzeko garrantzi handiko instrumentu" gisa sortua.

Horren harira, Ekonomiaren Garapen Sailak laguntzak eskainiko ditu emakumeek Gizarte Segurantzan izena eman dezaten, eta titulartasun partekatua duten ustiategiek lehentasuna izango dute Eusko Jaurlaritzaren diru-laguntzak jasotzeko orduan.

Sailburuak nekazal munduan emakumeen eta gizonezkoen artean dagoen "desoreka" azpimarratu du, zenbait adibide erakutsiz: lanaren onarpen baxuagoa, emakumeen izenean dauden ustiategi kopuru "izugarri baxua", eta negozioaren balio ekonomikoak gora egin ahala, emakumeen presentzia urriagoa.

Hori dela eta, Emakume Nekazarien Estatutuak nekazal organo erabakitzaileetan emakumeen parte hartzea bultzatuko du, egun "ia ordezkaritzarik ez" baitute.

Egoera aldatzeko, Estatutuak emakumeek organo horietan izan beharreko ordezkaritza portzentajea ezartzen du, eta helburu horiek lortzeko epe "malguak".

Araudiak indarkeria matxista eta jazarpena ekiditeko neurriak proposatu ditu, nekazal munduan giroa "itxiagoa" izanik, atzemateko zailagoak baitira erasoak.

Emakume Nekazarien Estatutuak "emakumeek nekazal munduan egindako lana aitortzea eta ikusgarri bihurtzea" du helburu.

Bestalde, Tapiak adierazi du Jaurlaritzak milioi bat euroko diru-laguntzak eskainiko dizkiela itsasoko produktuak saltzen dituzten enpresa txiki eta ertainei, sektorea bultzatzeko "helburu estrategikoaren baitan". Iaz, 800.000 euroko laguntzak jaso zituzten 29 enpresak.