Eusko Legebiltzarra
Administrazio Publikoaren Lege 'itxia' kritikatu dute ELAk eta LABek
Erredakzioa
Sindikatu abertzaleen esanetan, proiektuaren testua “itxia” da eta “aldez aurretik joko-zelaia markatuta dago”. Bi sindikatuetako kideek agerraldia egin dute Legebiltzarreko batzordean.
Administrazio Publikoaren Lege proiektua kritikatu dute ELA eta LAB sindikatuetako ordezkariek. Sindikatu abertzaleen esanetan, proiektuaren testua “itxia” da eta “aldez aurretik joko-zelaia markatuta dago”.
Bi sindikatuetako kideek agerraldia egin dute Eusko Legebiltzarreko batzordean.
“Eztabaida lasaia” egiteko aukera izateko Legea gelditzea eskatu dute ELAko ordezkariek.
Sindikatuek alegazioak aurkezteko aukera soilik izan dutela onartu dute LABeko kideek, baina testua idazteko garaian eragile sozialen eta langileen parte-hartzea bermatzeko prozesu “adostu” bat martxan jarri ez dutela kritikatu dute.
Proiektu "herrena" da
EAEko Administrazioaren euskalduntzea eskatu dute bi sindikatuek. Bestalde, sistema gardenago eta parte-hartzaileago bat lortzeko aurrerapausoak eskatu dituzte. Bi aspektu horietan proiektua “herrena” dela uste dute.
Parte-hartze prozedura “konkretuagoak” arautzearen garrantzia errepikatu du LABek.
ELAren hitzetan, EAEko Administrazioak “pribatizazio” prozesu pairatu du azken urteetan. Zentzu horretan, prekarizazioa eta behin-behinekotasuna salatu ditu sindikatu abertzaleak.