Soldaten inguruko akordioa
Confebaskek EAEko sindikatuak deitu ditu Estatuko ituna aztertzeko
Agentziak | Erredakzioa
Soldaten akordioa gogor kritikatu zuten LAB eta ELA sindikatuek, patronalaren helburuak asebete eta langileak desmobilizatu nahi dituelako.
Miguel Angel Lujua Confebaskeko presidentea. Artxiboko irudia: EiTB
Estatuan adostutako negoziazio kolektiboaren inguruko akordioa “Euskadi mailan” aztertzeko bilera batera deituko ditu Confebaskek sindikatuak, Euskal Enpresarien Konfederakuntzak agiri batean jakitera eman duenez.
Enplegu eta Negoziazio Kolektiboaren III. Akordioa ekainaren 8an sinatu zuten CCOO eta UGT sindikatuek eta CEOE eta Cepyme patronalek. Aurten % 1eko soldata igoera aurreikusten du itunak, eta % 1,5ekoa 2016an. 2017ko igoera datu makroekonomikoek baldintzatuko dutela zehazten du akordioak.
Akordioa gogor kritikatu zuten LAB eta ELA sindikatuek, patronalaren helburuak asebete eta langileak desmobilizatu nahi dituelako.
EAEko sindikatuak deitzea aho batez adostu du gaur Confebasken zuzendaritzak, bileran Estatuko ituna “Euskadi mailan” aztertzeko.