Ehunka lagunek protesta egin dute Arcelorren erabakiaren aurka

Ehunka lagun bildu dira arratsaldean Donostian ArcelorMittalek Zumarragan duen lantokiaren itxiera partzialaren aurka.

17:00etan abiatu da protesta Diputazioaren aurrean, "industria politika baten alde, Arcelorrik gabeko etorkizunari ez" lemapean.

"Jo, ta, ke, irabazi arte", "Administrazioa, inplikazioa” eta “Urkullu esnatu, langabezia ate-joka duzu" oihuak egin dituzte ArcelorMittaleko langileek.

Langileek hitzartutako mobilizazio egutegiaren barruan dago gaurko elkarretaratzea. Datorren ostiralean lanuztea egingo dute.

Leo Bote enpresa-batzordeko presidenteak adierazi duenez, langileek ez dute enpresaren jakinarazpen ofizialik jaso. Halere, azaldu duenez, langileen ordezkariak bilera batera deitu dituzte datorren astearterako, bilera lekuari buruzko akordiorik ez badago ere.