Sestaoko ontziola
Astelehenean ekingo die Del Dagok Naval birfinantzatzeko negoziaketei
AGENTZIAK | ERREDAKZIOA
Ontziola, bitartean, egiten ari den ontzietako armadoreekin negoziatzen ari da, ontzien kostuaren zati bat aurrera dezaten eraikitzeko lanak amaitzeko modua izan dezan.
Manuel del Dago enpresaria astelehenean iritsiko da Madrilera, finantza erakundeekin elkarrizketatu, eta Naval ontziola birfinantzatzeko akordioa erdiesteko asmoz.
Ostiralean zen bukatzekoa ekainean Navaleko Akziodunen Ezohiko Batzar Orokorrak onartu zuen kapital handitzearen bigarren epemuga.
Kapital handitze horretan adostu zenaren arabera, Del Dagok kapitalaren % 80 izenpetu beharko luke, ordura arte akziodun nagusiak ziren Ingeteam eta Muruetaren kaltetan (kapitalaren % 33,8 zuen bakoitzak).
Inbertitzaileak kontrolatzen duen Naviera del Nervion enpresako iturriek adierazi dutenez (Navaleko erreferentziazko akzioduna ere bada), Manuel del Dago astelehenean helduko da Madrilera " finantza erakundeekin elkarrizketatu eta Naval ontziola birfinantzatzeko akordioa erdiesteko asmoz".
Navaletik azaldu dutenaren arabera, kapital handitzea gaur bertan ez betetzeak "ez du aparteko garrantzirik"; izan ere, "burokrazia hutsa besterik ez da", eta beste epe batzuk zehaztekotan daudela nabarmendu dute.
Ontziola, bitartean, egiten ari den ontzietako armadoreekin ari da negoziatzen, ontzien kostuaren zati bat aurrera dezaten eraikitze lanak amaitzeko modua izan dezan.
Dagoeneko adostu dute eraikitzen ari diren kable-ontziko armadorearekin 3,5 milioiko aurrerapena, eta horrek 200 langilek hilabetez beren zereginetan jarraitzea ahalbidetuko du.
Bestalde, Del Dagorekin negoziatzen jarraitzen dute Naval berregituratzeko prozesuan izango duen parte-hartzea zehazteko.