FAGOR
Edesako langileek enpresako makinen salmenta salatzeko elkarretaratzea egin dute
Agentziak | erredakzioa
Enpresako makinak erosi nahi dituen talde baten bisita dela eta egin dute protesta. Langileek ez dute lantegiaren "desegitea onartuko likidezia lortzeko eta kaleratzeak bideratzeko".
Edesako langileen elkarretaratzea, gaur, Basaurin.
Edesako langileek elkarretaratzea egin dute asteazken honetan Basauriko lantegiaren aurrean, enpresako makinak erosi nahi dituen talde baten bisita salatzeko.
Protesta 08:00etan hasi da eta bi ordu eman dituzte, Edesaren desegitearen aurkako pankarta baten atzean.
Langileez gain, Andoni Busquet Basauriko alkatea eta Udaleko zenbait zinegotzi izan dira bertan.
Edesako langileek Efe albiste agentziari adierazi diotenez, termoak egiteko lantegiko makinen funtzionamendua ikustera etorri da talde hori bisitan; horren harira, gaur baino lehen, atzo egon ziren, eta baliteke beste bisita bat egitea astean zehar.
Edesako zuzendaritzak lanpostuak suntsitzeko lan-erregulazioko espedientea aurkeztu du lantegian. Langileek enpresaren aktibitatea mantentzeko "irtenbideak bilatzeko prest" daudela esan duten arren, ez dute lantegiaren "desegitea onartuko likidezia lortzeko eta kaleratzeak bideratzeko".
Horren aurrean, Edesa mantentzeko konkurtso-administratzailearen eta Cata enpresaren zein Fagor Sozietate Kooperatiboaren eta EAEko erakundeen parte-hartzea eskatu dute langileek.