Sindikatuek greba deitu dute itunpeko ikastetxe pribatuetan martxoaren 20an

Steilas, LAB, ELA, CCOO eta UGT sindikatuek greba deitu dute Araba, Bizkaia eta Gipuzkoako itunpeko ikastetxe pribatuetan datorren martxoaren 20an.

Sindikatuek ohar batean salatu dutenez, patronalek (Kristau Eskola eta Irakaskuntza Zentroen Elkarte Autonomoa) ez dute lan-hitzarmena negoziatzeko borondaterik eta, ondorioz, grebara jotzea beste aukerarik ez dute izan. 2009tik dute hitzarmena berritu gabe.

Kaltetutako langileak 9.000tik gora direla ohartarazi dute. 2009ko soldatak kobratzen ari direla, erosteko ahalmenaren % 13,6 galdu dutela eta Eusko Jaurlaritzak itunpeko zentroei ezarritako finantzazio igoerak ere ez dizkietela eskaintzen salatu dute.

Gainera, hezkuntzan "aldaketak sakonak" eman direla gogoratu dute, besteak beste, teknologia berrien aplikazioa, ingelesaren erabilera handitzea edo haur-hezkuntza hitzarmenetik kanpo dauden itunpeko zentroetara zabaltzea.

Horrez gain, jaiotze-tasaren beherakadak eragindako arazoari aurre egiteko plan bat lantzea galdegin dute, haur-hezkuntzan gelak ixtea eta kaleratzea egotea saihesteko eta enplegua eta errelebu-kontratua bermatzeko.