OSAKIDETZAKO AZTERKETAK
Osakidetzako lan eskaintza publikoa bere horretan mantentzen dela esan du Erkorekak
AGENTZIAK | ERREDAKZIOA
Eusko Jaurlaritzako bozeramaileak Jon Darpon Osasun sailburuak esandakoa berretsi du eta lan eskaintza publikoko azterketak aurreikusitako egunetan egingo direla azpimarratu du.
Josu Erkoreka Eusko Jaurlaritzako bozeramailea. Argazkia: EFE
Eusko Jaurlaritzak "gaur gaurkoz" ez dauka 2018ko Osakidetzako lan eskaintza publikoa geldiarazteko asmorik, Josu Erkoreka Eusko Jaularitzako bozeramaileak gaur adierazi duenez. Oposizioko taldeek eta hainbat sindikatuk azterketak filtratu direnaren zantzuak daudela ohartarazi arren, aurreikusitako egutegiari eutsiko dio Osakidetzak.
Gobernu bileraren osteko prentsaurrekoan oposizioetan ustez izan diren irregulartasunen inguruko azalpenak eman ditu Gobernu bozeramaileak.
Jon Darpon Osasun sailburuak atzo esandakoa berretsi du eta ordutik Jaurlaritzaren aldetik jarrera aldaketarik ez dela izan nabarmendu du.
Hori dela eta, Erkorekaren hitzetan, "gaur gaurkoz ez dago azterketak geldiarazteko eta aurreikusitako egutegia aldatzeko asmorik".