EH Bilduk eta Elkarrekin Podemosek Navalen erreskate publikoa eskatu dute

EH Bilduk eta Elkarrekin Podemosek legez besteko proposamena aurkeztu dute gaur (ostirala) Eusko Legebiltzarrean, Sestaoko Naval ontziolaren erreskate publikoa eskatzeko, sektore estrategikoa eta EAEko ekonomiaren sutatzailea dela uste baitute.

Proposamena premiaz bideratzeko eskatu dute, enpresak bizi duen egoera "larria" dela eta, "itxiera saihesteko berehalako neurriak hartzea beharrezkoa" baita.

Eusko Legebiltzarreko alderdiek ontziolaren jarraipena eta Ezkerraldeko industria osagarria babes ditzaten, eta ondorioz, Eusko Jaurlaritzari ontziolaren "itxiera saihesteko baliabide guztiak erabili" ditzan eskatzea da talde bien asmoa, ontziolak "enplegua eta aberastasuna" sortzen baitu.

Hori horrela, hurrengo bi asteotan hiruko mahaia dei dezala eskatu diote Urkulluren Gobernuari; bertan, Espainiako Gobernuak, Jaurlaritzak eta langileen ordezkariek parte hartuko lukete, ontziola "erabat edo neurri batean berriro publiko bihurtzeko" aukera aztertzeko.

Bestalde, administrazio publikoek ikuspuntu juridiko, ekonomiko eta industrialetik Navalen "jarduera produktiboaren kudeaketa eta aktiboak erabat edo neurri batean erosteko" duten gaitasunaren inguruan premiazko txostena egiteko eskatu diote Eusko Jaurlaritzari.