Lan-gatazka
La Navaleko enpresa batzordea Ezkerraldeko lau alkateekin batzartuko da gaur
AGENTZIAK | ERREDAKZIOA
Otsailaren 12an La Navaleko langileek Madrilen egingo duten elkarretaratzea babesteko eskatuko die Barakaldoko, Sestaoko, Portugaleteko eta Santurtziko alkateei.
Sestaoko Naval ontziolaren irudia. Argazkia: EFE
La Navaleko enpresa batzordea Ezkerraldeko lau alkateekin bilduko da gaur, otsailaren 12an La Navaleko langileek Madrilen egingo duten elkarretaratzea babestea eskatzeko.
173 langile kaleratuko dituen lan-erregulazioko espedientearen aurkako jarrera azaltzeko eskatuko diete langileen ordezkariek lau alkate horiei, eta La Navaleko langileek Diputatuen Kongresuaren parean egingo duten elkarretaratzearekin bat egiteko.
Sestaoko udaletxean batzartuko dira, 16:00etan, eta bertan izango dira Amaia del Campo (EAJ), Josu Bergara (EAJ), Aintzane Urkijo (EAJ) eta Mikel Torres (PSE-EE), Barakaldoko, Sestaoko, Santurtziko eta Portugaleteko alkateak, hurrenez hurren.