EPA inkesta Nafarroan
Enplegu-tasaren 'gutxiespenari' egotzi dio Laparrak langabeziaren hazkundea
Agentziak | Erredakzioa
Miguel Laparra Nafarroako Gobernuko Eskubide Sozialen presidenteordearen esanetan, lagin aleatorio bat hartzen duen inkesta baten zuzenketa estatistiko batek eragin du gutxiespen hori.
Miguel Laparra Nafarroako Gobernuko Eskubide Sozialen presidenteordea. Artxiboko argazkia: EFE
Miguel Laparra Nafarroako Gobernuko Eskubide Sozialen presidenteordeak enplegu-tasaren "gutxiespenari" egotzi dio langabeziak Nafarroan gora egin izanak.
Nafarroan igo egin zen langabezia iaz (1.800 langabe gehiago zenbatuta): 2017arekin alderatuta % 5,9ko igoera, eta % 4,37koa, aurreko hiruhilekoarekin alderatuta.
"Langabeziak gora egin duela dirudi, baina egia esan, lagin aleatorio bat hartzen duen inkesta baten zuzenketa estatistiko bat baino ez da", azaldu du Laparrak prentsaurrekoan. Ildo horretan, Nafarroako Gobernua lan-merkatuaren inguruko inkesta propioa egiteko aukera aztertzen ari dela esan du.
Nafarroako Enplegu Politiken garapenerako komenigarria izango litzateke zehaztasun maila handiagoa lortzea, batez ere, modulu espezifiko batzuekin; hortaz, inkesta propioa "proiektu interesgarria izan litekeela" gaineratu du.
Laparraren esanetan, Nafarroa (% 9,99 langabezia-tasa), EAE (% 9,58) eta Kantabria (% 9,68) dira azken hiruhilekoan langabezia-tasarik txikiena izan duten erkidegoak.