Dbusek 12 metroko 9 autobus erosiko ditu aurten

Dbus Donostiako autobus konpainiak 12 metroko 9 autobus erosiko ditu aurten, baina 2020an jarriko dira zerbitzuan. Horrez gain, datozen lau urteetan ezaugarri horiek dituzten beste 30 autobus erostea aurreikusten du.

Ohar bidez jakinarazi duenez, "datozen egunetan" ekingo dio 9 autobusak erosteko lizitazio prozesuari. Ibilgailu berriak % 100 irisgarriak izango dira, plataforma baxuak eta arrapala elektrikoak edukiko baitituzte mugikortasun urria duten pertsonen sarrera-irteerak errazteko.

Lizitazioan, bi lote bereiziko dira, autobusen teknologiaren arabera; izan ere, dieselak izan daitezke edo DGT Espainiako Trafiko Zuzendaritzaren ECO etiketa eraman ahal dutenak (autobus hibridoak, hibrido-elektrikoak, gasezkoak eta abar).

Horrez gain, baloratu egingo dute erregaia aurreztea, igorpen kutsatzaileak eta kutsadura akustikoa murriztea eta funtzionaltasun batzuk edukitzea (start&stop eta start&go sistemak eta gidatze erosoa, besteak beste).

Gaur egun, Dbusek 12 metroko 3 autobus % 100 elektriko eta 38 autobus hibrido ditu. Autobus berriak martxan jarritakoan, 2020an, 12 metroko autobusen % 50, gutxi gorabehera, elektriko-hibridoak izango dira eta 1.000 tona CO2 gutxiago igorriko dira atmosferara, aurreikuspenen arabera.