Abuztuan
G7 taldeak Biarritzen egingo duen goi-bileraren aurka protesta egin dute
eitb.eus
Goizean Bilbon, Gasteizen eta Iruñean egin dira bilkurak, arratsaldean berriz, Donostiako kaleak zeharkatu dituzte ehunka manifestarik.
G7 taldearen bileraren aurkako protesta Donostian. Argazkia: Maria Agirre/Euskadi Irratia
Abuztuan G7 taldeak Biarritzen (Lapurdi) egingo duen goi-bileraren aurka hainbat protesta egin dira gaur Euskal Herrian. Goizean Bilbon, Gasteizen eta Iruñean egin dira bilkurak, arratsaldean berriz, Donostiako kaleak zeharkatu dituzte ehunka manifestarik, Euskadi Irratiak azaldu duenez.
Salatu dutenez, "G7 taldeak kapitalismoa indartzea du helburu", eta "desberdintasun sozialak are handiagoak izango dira".
Easo plazatik abiatu den manifestazioak Donostia erdialdeko hainbat kale zeharkatu ditu, abuztuan G7ak Biarritzen egingo duen goi-bilerak ekarriko dituen ondorio kaltegarriez ohartarazteko.
Maddi Arrieta 'G7ari Ez' plataformako kideak salatu duenez, herrialde aberatsenen bilerak "desberdintasun sozialak areagotuko ditu". "G-7ak klima aldaketa bultzatzen du, eta behartutako migrazioak ere eragiten ditu". Xabi Areta 'G7ari Ez' plataformako kideak esan duenez, "zerrenda luzea da".
"Aukerak" dituztela eta horiek aurkeztu nahi dituztela adierazi dute. Hori dela eta, G7 taldearen bilera hasi baino astebete lehenago, kontra-bilera egingo dute astebetez Irunen.