Urte arteko BPGa
EAEko ekonomia uste baino gutxiago hazi da hirugarren hiruhilekoan, % 2raino
Agentziak | Erredakzioa
Urte arteko hazkundea sektore guztien portaera positiboaren ondorio da, nahiz eta industrian eta eraikuntzan nolabaiteko dezelerazioa izan.
Abenduaren 2an Eustatek BPGaren estimazioak emango ditu. ETBren bideo batetik ateratako argazkia
Euskal Autonomia Erkidegoko (EAE) Barne Produktu Gordinaren (BPG) urtebeteko tasa % 2,0koa izan da hirugarren hiruhilekoan, Eusko Jaurlaritzak epe horretarako aurreikusitakoa (% 2,2) baino bi hamarren gutxiago.
Barne Produktu Gordina % 0,4 hazi da 2019ko bigarren hiruhilekoarekin alderatuta, baita aurreko hiruhilekoan zenbatetsitakoa baino bi hamarren gutxiago ere, Eustat Euskal Estatistika Erakundearen hiruhilekoko kontuen aurrerapenaren arabera.
Eskaintzaren aldetik, udako hilabeteetako urte arteko hazkunde positiboa sektore guztien portaera positiboaren ondorio da; hala ere, industrian eta eraikuntzan nolabaiteko dezelerazioa izan da.
Enplegua, lanaldi osoko lanpostu baliokide gisa neurtuta, % 1,6 hazi da 2018ko hirugarren hiruhilekoarekin alderatuta, 2019ko bigarren hiruhilekoan behatutakoa baino hamarren bat gutxiago, hain zuzen. Hiruhileko arteko hazkundea % 0,4koa izan da, aurreko hiruhilekoan baino hamarren bat txikiagoa.
Datorren abenduaren 2an, Eustatek hirugarren hiruhileko honetarako BPGaren eta enpleguaren zenbatespenak argitaratuko ditu, aurrerapen hori argitara emateko unean ez duen egoeraren araberako informazioa sartu ondoren.
2019. urterako, Eusko Jaurlaritzaren azken aurreikuspena da EAEko BPGa % 2,2 haztea, aurrez aurreikusitakoa baino hamarren bat gutxiago. Enpleguari dagokionez, urte osorako hazkunde aurreikuspena % 1,6koa da, eta horrek 15.000 lanpostu inguru sortzea ekarriko luke.
Eusko Jaurlaritzak nabarmendu duenez, adierazle koiunturalek eraikuntzaren, etxebizitzaren eta karga-ibilgailuen matrikulazioaren okerragotzea iradokitzen dute. Hala ere, zerbitzuek "sendotasun nabarmena" dute, eta industriak "pauso txikiak" ematen jarraitzen du susperraldi prozesuan, sektoreko giroa hobetuz.