Koronabirusa
Espainiako Estatuaren BPGa aurten % 8 jaitsiko dela aurreikusi du NDFk
agentziak | erredakzioa
Gainera, Nazioarteko Diru Funtsaren arabera, langabeziak % 6 egingo du gora 2020an, % 20,8ra arte.
Langilea. Argazkia: EiTB
Espainiako Estatuko Barne Produktu Gordinak % 8 egingo du behera eta langabezia sei puntu haziko da, % 20,8ra arte, 2020an, koronabirusaren pandemiak eragindako "aurrekaririk gabeko krisiaren" ondorioz, Nazioarteko Diru Funtsak azkeneko txostenean azaldu duenez.
Euroguneko BPG, berriz, % 7,5 murriztuko da aurten, eta ekonomia handienen artean, gehien sufrituko duena Italia izango da, % 9,1eko atzeraldiarekin, Espainiaren (% 8), Frantziaren (%7,2) eta Alemaniaren (% 7) aurretik.
"Europaren zati batean agerraldia Txinako Hubei probintzian bezain larria izan da. Birusari aurre egiteko oinarrizkoa bada ere, konfinamenduak eta mugikortasunaren mugak kolpe gogorra eman diote jarduera ekonomikoari", azaldu du NDFk.
Duela hiru hilabete eskas, Espainiako ekonomiarentzat % 1,6ko hazkundea iragartzen zuen, eta % 1,3koa Eurogune osoa aintzat hartuta.
2021erako, berriz, Espainiako BPGa % 4,3 haziko omen da, eta % 4,7, Eurogunekoa,.
Hala eta guztiz ere, Gita Gopinath txostenaren koordinatzaileak aitortu du "ziurgabetasun handia" dagoela, eta datu horiek lortzeko aurreikuspena uztailetik aurrera pandemia baretu egingo dela omen da, baina atzeratu egin daiteke.
NDFk batzarra egingo du Munduko Bankuarekin aste honetan bertan, udaberrian egin ohi duten asanblada, baina aurtengoan telematikoa izango da.