Pedro Azpiazu: "EAErentzat ez da nahikoa Nafarroak adostutako % 2,3ko zorpetzea"

Iñigo Urkullu jarduneko lehendakariak bihar, ostirala, presidenteen biltzarrera joatea edo ez joatea erabakitzea haren hautua dela eta berdin errespetatuko duela adierazi du ostegun honetan Pedro Azpiazu jarduneko Ekonomia eta Ogasun sailburuak Radio Euskadiko Boulevard albistegian. Ildo horretatik, Pedro Sanchezen gobernuak "gainditu behar ez zituen epe guztiak gainditu" dituela ziurtatu du, Kontzertu Ekonomikoaren Batzorde Mistoa ez deitzeagatik. Gauzak horrela, oraindik ez duenez bilera deitu, presidenteen biltzarrera ez joateko "erabakia lehendakariak hartzen du" eta "berak erabakitakoa errespetatzen dut".

"Zorpetzea erabil dezakegu zergen bidezko bilketaren jaitsiera nolabait leuntzeko". Azpiazuk adierazi du Nafarroak Espainiako Gobernuarekin adostutako % 2,3ko defizit helburua ez litzatekeela nahikoa izango Euskadiren kasuan zerga bilketaren jaitsiera leuntzeko. "Jakin behar dugu zenbat defizit izan dezakegun", azaldu du Azpiazuk, eta Kontzertu Ekonomikoaren Batzorde Mistoa lehenbailehen deitzeko eskatu du. Ildo horretatik, uztaileko lehen astean Espainiako Gobernuarekin biltzeko "konpromiso politikoa" zegoela nabarmendu du, baina topaketa ez dela posible izan eta bihar hilabetea amaitzen dela deitoratu du.

Gaur egungo egoera ikusita, Euskadik "hondoa jo" duela uste du Azpiazuk, eta, bere iritziz, "hiruhilekorik txarrena, ezinbestean, bigarrena da". Aurreikusitako % 13ko beherakada % 20ra iritsi den errealitatetik urrun geratu dela aitortu du. "Datu berriekin egindako berrikuspena da". Nazioarteko Diru Funtsaren arabera, munduko ekonomia % 5 jaitsiko da. Dena dela, "enpresen konfiantza apur bat hazten ari dela" balioan jarri du, baita Michelinek aldi baterako lan-erregulazioen amaiera aurreratzea erabaki duela.

"Koronabirusak eragindako krisiaren okerrena bigarren hiruhilekoan izan da". Azpiazuren iritziz, hirugarren eta laugarren hiruhilekoetatik aurrera "egoera hobetzen" joango da, bai jarduera, bai enplegua. "Desio bat da, baina datu ekonomikoetan oinarritua", gaineratu du. "Irailean aurreikuspen ekonomikoa berrikusiko dugu".

Bestalde, aurrekontuak prestatzen ari direla aurreratu du Azpiazuk. "Helburu argiak daude. Osasuna indartzea. Enplegua. Berrikuntza. Prestakuntza. Politika ekitatiboak. Trantsizio energetikoa eta digitala". Gastu publikoa handitzea "funtsean zorpetzetik" etorriko da, estatuko funtsetatik eta Europako funtsetatik, Azpiazuk esan duenez, eta 2021 baino lehen ez du espero EBren finantzaketa. "Gaurko zorpetzea urte batzuk barru lanean ari diren gazteek ordainduko dute, neurri batean".

Bestalde, orain zergei buruz eta zerga erreforma bati buruz "hitz egitea premiazkoari buruzko arreta desbideratzea" litzatekeela adierazi du, nahiz eta horri heldu beharko zaion eztabaida dela uste duen. Bestalde, ahal den jarduera guztietan soldatei eustearen alde agertu da, eta adierazi du Jaurlaritza ere "ahalegin hori" egiten saiatuko dela.

Jatorrizko informazioa Radio Euskadik landu eta eitb.eus-ek itzuli du: