Laguntzarik jaso ezean turismo agentzia hartzaileak "berehala itxi" beharko dituzte

EAEra iristen diren turisten bisitak antolatzen dituzten agentziek ohartarazi dute "berehala itxi" beharko dituztela eskatutako laguntzak iristen ez bazaizkie.

Euskadiko Turismo Harrera Agentzien Elkarteko 27 enpresek azaldu dutenez, "langileen % 86 aldi baterako lan erregulazioko espedienteen eraginpean daude eta lanpostuen % 11 dagoeneko suntsitu dira".

Elkarteko presidente Lorea Urangaren esanetan, agentzia hartzaileen erdiak "oso serio" ari dira pentsatzen ixtea, edo aukera hori baloratzen ari dira behintzat. Horren arabera, orain arte negozio kaudimendunak ziren eta ondo funtzionatzen zuten, baina bizi dugun egoeraren ondorioz gaur egun funtzionatzeari utzi diote.

Mikroenpresa horiek (gehienak 5 langile baino gutxiagokoak) salatu dute orain arte Gipuzkoako agentziek bakarrik jaso dituztela laguntzak eta gainerakoak "abandonatuta" sentitzen direla. "Laguntzak berehala ordaintzen ez badira, enpresen itxiera gero eta hurbilago dago", ohartarazi dute.

Eusko Jaurlaritzak eta Bizkaiko eta Gipuzkoako foru aldundiek COVID-19ak eragindako krisia dela eta turismoaren sektorerako aurkeztutako berariazko laguntzetako batzuk eskatu dituzte agentziek. Baina Bizkaiko Foru Aldundiak ez ditu laguntzak ebatzi oraindik, ezta Jaurlaritzak bereak eman ere.

Era berean, enpresek itzuli beharrik gabeko dirulaguntzak, suspertze proiektuak, gida ofizialen homologazioak eta BEZa % 10era jaistea eskatzen dute sektorerako. Gainera, euren bezeroak atzerritarrak direla gogorarazi dute, eta, beraz, mugak itxita dauden bitartean laguntzak ematen jarraitu behar dutela azaldu dute.