Lan-gatazka
Kelvioneko enpresa-batzordeak epaitegietara joko du, kontsulta-epea amaitu ostean
Agentziak | EITB Media
Igorreko lantegiko enpresa-batzordeak jarduera ekonomikoari eta enpleguari eustearen alde egin du. Hala, agintariei interpelazioa egiteko dinamikak eta mobilizazioak aktibatuko ditu.
GEA Kelvion enpresak Igorren (Bizkaia) duen lantegia. Argazkia: Google Maps
GEA Kelvion lantegiko enpresa-batzordeak Igorreko lantegian jarduera ekonomikoari eta enpleguari eustearen alde egin du, eta, beraz, Bizkaiko fabrikako 74 langilerentzako kaleratze kolektiboaren kontsulta-aldia amaitu ondoren, demandak jarriko ditu epaitegietan. Horrez gain, agintariei interpelazioa egiteko dinamikak eta mobilizazioak aktibatuko ditu, etorkizunera begirako grebak barne.
ELA eta LAB sindikatuek ohar baten bidez jakinarazi dutenez, greba bertan behera uztea erabaki dute 36 egun lantegi horren aurrean igaro ostean. Zehazki, Kelvion Thermal Solutions enpresak abiatutako kaleratze kolektiboaren kontsulta-epea amaitu eta gero deitu zuten greba. Guztira, 147 langilek egiten dute lan enpresa horretan, eta horietako 74k Igorreko lantegian.
Kontsulta-epea Kantabriako eta Madrilgo ordezkarien akordioarekin amaitu da. Akordio horrek urteko 30 eguneko kalte-ordainak jasotzen ditu, 18 hilabeteko mugarekin, baina urteko soldataren tarteen araberako muga linealak ere ezartzen dira. Akordioaren arabera, enpresak langile guztiak kaleratu ahal izango ditu 2021. urtean, ekoizpen-beharren arabera.
Alabaina, Igorreko GEA Kelvion enpresako langileen batzarrak atzera bota du akordio hori. Testuinguru horretan, Igorreko enpresa-batzordeak (LABeko hiru ordezkarik eta ELAko bi ordezkarik osatzen dute) ez du akordioa sinatu eta uko egin dio Bizkaiko lantegiaren itxierari.
Hala, enpresa-batzordeak Igorreko lantegian jarduera ekonomikoari eta enpleguari eustearen alde egin du; izan ere, enpresa horren bideragarritasuna "frogatuta geratu da kontsulta-aldi honetan", eta, beraz, lantegia irekita mantendu nahi du.
Gainera, Igorreko lantegiaren defentsan modu eraginkorrean parte hartzeko eskatu dio Eusko Jaurlaritzari eta, zehazki, Industria Sailari. "Duela astebete baino gutxiago enpresako zuzendaritzak Igorreko fabrika saltzeko eta jarraitzeko aukeraren berri eman zigun. Arratian fabrika gehiago ez ixteko zer egin duen eta zer egingo duen galdetu diogu Industria Sailari", azaldu du enpresa-batzordeak ohar batean.