Analisi ekonomikoa
2022ra arte ez da suspertuko Euskadiko ekonomia, adituen arabera
N.B. | EITB MEDIA
Euskal ekonomialarien ustez, Euskadiko egoera ekonomikoak okerrera egingo du seihileko honetan, eta langabezia da heldu beharreko arazo nagusia, krisitik "motel" irtenda.
Ekonomialarien Euskal Elkargoaren inkestako datuak dira. Argazkia: EFE.
Euskadiko ekonomiaren susperraldia ez da 2022ra edo 2023ra arte iritsiko, eta egoerak okerrera egiten jarraituko du 2021eko lehen seihilekoan, Ekonomialarien Euskal Elkargoak bere elkargokideen artean sei hilean behin egiten duen inkestaren arabera.
Inkestatuen % 49,2k adierazi dute 2022an suspertuko dela Euskadi, eta % 28,8k esan dute 2023ra arte itxaron beharko dela; % 2,6k uste dute 2021eko lehen seihilekoan suspertuko dela, eta % 19,4k uste dute 2021eko bigarren seihilekoan suspertuko dela.
2021eko lehen seihilekoan, % 43k uste dute EAEko ekonomiaren bilakaera negatiboa izango dela, eta % 41ek uste dute hobera egingo duela, baina % 67k uste dute langabeziak gora egingo duela datozen sei hilabeteetan.
Txostenaren arabera, ekonomialarien % 75ek osasunaren eta ekonomiaren arreta bateratu eta paraleloaren alde egiten dute. % 20k uste du osasuna lehenetsi behar dela, eta % 3,7k soilik uste du ekonomiaren arreta lehenetsi behar dela.
Berreraikuntzarako Europako funtsei dagokienez, % 31k uste dute osasuna hobetzeko erabili behar direla, eta % 28k uste dute industria sarearen modernizazioa eta digitalizazioa lehenetsi behar direla, eta % 14rentzat funtsen helburu nagusia zientzia eta berrikuntza izan beharko litzatekeela.
Ekonomiaren lehiakortasunari dagokionez, ekonomialariek uste dute faktorerik garrantzitsuena I+G+b dela, eta, ondoren, kontsumoa eta soldata-kostuak. Iruzurra eta energiaren prezioa azken postuetan daude. Aurreko edizioetan azken postuetan zegoen finantzaketa erdialdera pasatu da.