URTARRILA ETA OTSAILA
Zerga-bilketa % 6,6 jaitsi da Euskadin urtarrila eta otsaila bitartean
N. B. | EITB MEDIA
EAEko hiru ogasunek 2.564,1 milioi euro bildu dituzte aurtengo lehen bi hilabeteetan, 2020an baino 182,1 milioi gutxiago.
EAEko hiru ogasunek 2.564,1 milioi euro bildu dituzte aurtengo lehen bi hilabeteetan, hau da, 2020ko epe berean baino % 6,6 gutxiago: 182,1 milioi gutxiago.
Atzerakada hori ez dator bat 2020ko urtarrila eta otsaila bitartean izandako % 6,2ko gorakadarekin; izan ere, artean alarma-egoera ezarri gabe zegoen eta ekonomia ez zegoen suspertzen hasita.
2021eko hasiera honetan, diru-bilketa murriztu egin da hiru lurraldeetan. Bizkaiak 1.606,5 milioi euro bildu ditu urtarrila eta otsaila bitartean, % 6,8 gutxiago; Gipuzkoak 686,1 milioi, % 2,8 gutxiago; eta Arabak 271,4 milioi, % 14 gutxiago.
Bizkaian, urteko lehen bi hilabeteetan zerga bidez diru gutxiago bildu izanaren arrazoia zeharkako zergetako diru-sarreren jaitsiera izan da, BEZaren bidez % 15,3 gutxiago bildu baititu (527,3 milioi euro).
Zerga berezien bidez lortutako diru-sarrerak ere % 9,2 jaitsi dira, eta gainerako zeharkako kargak, % 6,3.
Zerga zuzenen bidez bildutakoak, aldiz, gora egin du lurralde horretan. PFEZaren bidez 748,5 milioi euro bildu ditu (% 0,8ko igoera), eta Sozietateen gaineko Zergaren bidez 52,4 milioi bildu ditu (% 5,9 gehiago).
Gipuzkoan, Foru Ogasunak diru gutxiago biltzea justifikatu du, "diru-sarrerak nabarmen jaitsi direlako, % 6,6 jaitsi baitira, eta itzulketak % 50,8 apaldu dira", baina Aldundiaren ustez, "oraindik goiz da ondorioak ateratzeko, kanpaina nagusiak egin arte zaila baita joerak identifikatzea".
Gipuzkoako zeharkako zergen barruan, PFEZa % 2,2 jaitsi da 388,4 milioi euro eskuratu baititu (nahiz eta lan-errendimenduari lotutako zerga horren atala % 1,8 igo den), eta Sozietateen gaineko Zergaren bidez bildutakoa % 41,2 jaitsi da, 18,9 milioi bildu baititu.
Zeharkako zerga nagusien artean, BEZak % 0,7 egin du behera, eta 235,7 milioi euroko bilketa izan da.
Araban, Foru Aldundiak 2020ko aldi berean baino 44,4 milioi euro gutxiago bildu ditu urteko lehen bi hilabeteetan, eta diru-sarrera nagusiak jaitsi egin dira.
Zeharkako zergei dagokienez, PFEZak 140,9 milioi euro (% 9,8 gutxiago) biltzea ahalbidetu du, eta Sozietateen gaineko Zergak, 7 milioi euro (% 35,7 gutxiago). Zeharkako zergen kasuan, BEZak 101,2 milioi euroko ekarpena egin du; hau da, % 17,4 egin du behera.