OSTALARITZAKO NEURRIAK
Erabakiak “adituen datuetan” oinarrituta hartzen direla esan du Hurtadok
O. P. | EITB MEDIA
Sailburuak LABI babestu du, nahiz eta ostalariek covid-19aren aurka sektorean hartutako neurriak auzitara eramateko erabakia errespetatzen duen.
Javier Hurtado sailburua. EITBren artxiboko irudia.
Eusko Jaurlaritzako Turismo, Merkataritza eta Kontsumo sailburu Javier Hurtadok LABIren lana babestu du, eta, besteak beste, ostalaritza sektorearen gainean hartzen diren erabakiak adituen gomendioen arabera hartzen direla azpimarratu du.
Horrela erantzun dio ostalaritzak neurri berriengatik justiziaren aurrean helegiteak jarriko dituela jakinarazteko egindako iragarpenari. Onda Vasca irratian egindako elkarrizketan adierazi duenez, "erabat" errespetatzen du edozein pertsonak Administrazioaren erabakien aurrean auzitegietan errekurtsoa jartzeko duen eskubidea.
Dena den, irmo adierazi duenez, "adituek esan behar dute zein neurri hartu behar diren". Horrez gain, "adituen datuen arabera hartutako erabakiak" babesten jarraituko duela erantsi du, eta "kasu honetan, ostalaritzari dagozkionak".
SOS Ostalaritza kolektiboko kideak Eusko Jaurlaritzaren Donostiako egoitzan euren sektoreari ezarri zaizkion neurriengatik protesta egitera sartu baino minutu batzuk lehenago egin ditu adierazpen horiek sailburuak.