Finantza operazioa
CAF, Thales trenbideetako seinaleztapenak egiten dituen konpainia erosteko lehian
Eider Garaikoetxea | EITB MEDIA
EAEko taldeak Alstom, Hitachi Rail eta Wabtec erraldoiak ditu lehiakide. Gauzatzekotan, CAFek inoiz egindako operazio handiena litzateke.
CAFek Beasainen duen lantegia. ETBko bideo batetik ateratako argazkia.
CAF (Construcciones y Auxiliar de Ferrocarriles) enpresak Thales trenbideetako seinaleztapenak egiten duen konpainia frantsesa erosteko eskaintza egin du, Expasion egunkari ekonomikoak gaur jakinarazi duenez.
Beasaingo konpainiaren batera, Alstom frantsesa, Hitachi Rail italiarra eta Wabtec estatubatuarra aurkeztu dira erosteko eskaintzara. Operazioa 1.600 milioi eurokoa da, eta tamaina ikusita, PwC taldearekin batera egin du eskaintza CAFek (berak bakarka ez ei zuen nahikoa finantza ahalmen). Gainerako lehiakideak bakarka aurkeztu dira.
Gauzatuko balitz, tren eta autobus fabrikatzaileak inoiz egindako operazio handiena litzateke. Gainera, CAFek bere negozioa dibertsifikatu eta trenbideen seinaleztapenen merkatuan lider izatea lortuko luke.
Egunkariak aipatutako iturrien arabera, Thalesek trenbideetako seinaleztapenen zatia saldu nahi du negozioa defentsa eta alor aeroespazialera bideratzeko. Frantziako Estatua Thalesen % 25aren jabe da.