Sestao
Epaileak ez du helegitea onartu, eta Naval VGP belgikarrari ematea berretsi du
agentziak | eitb media
Epaileak atzera bota du Marina Meridionalen helegitea. Enkantean galtzaile atera zen enpresetako bat da hori, eta irabazleak ez zuela egitasmo industrialik argudiatu zuen helegitean.
La Naval de Sestao. Foto: EiTB
Naval ontziolaren likidazioa gidatzen ari den epaileak berretsi egin du lurzorua enkantearen irabazleari, VGP logistika enpresa belgikarrari, ematea.
Logistika konpainia belgikarra izan zen diru eskaintza handiena (36 milioi euro) egin zuena Sestaoko Naval eremu industrialeko 300.000 m²-ak eta itsasertzeko 20.000 m²-ak eskuratzeko. Epaileak VGPri eman zion eremua, eskaintza handiena egin zuelako.
Enkantean parte hartu eta galdu zuenetako batek, Marina Meridionalek, helegitea aurkeztu zuen esleipenaren aurka, eta argudiatu zuen bere eskaintzan egitasmo industriala jaso zuela, VGPrenean ez bezala.
Epaileak atzera bota du helegitea, eta gaur kaleratutako autoan gogorarazi du esleipena lortzeko "irizpide bakarra prezioa" zela. Horregatik, Marina Meridionali aurpegiratu dio "berak aurkeztutakoaren arabera eta gainerako eskaintza ekonomikoak ezagutu ostean berrikusi nahi zuela emaitza, ebaluagarria ez zen eta, ondorioz, gainerako enpresek aurkeztu ez zuten ustezko industria egitasmo baten balorazioa eskatuz".
Epailearen ebazpena irmoa da eta ez dago helegitea aurkezteko aukerarik. Hala, VGP da ontziolaren esleipenaren jabea.