LANA
Euskadiko sei lan eskaintzatik bat manufaktura industriatik dator
AGENTZIAK | EITB MEDIA
Manufaktura industria enplegu bulegoetan erregistratutako lan eskaintzen % 15,6 da. Ekainari dagokionez, ia lan eskaintza guztiak jaitsi ziren, eta gora egin duen alor bakarra eraikuntza da.
Pertsona bat industrian lanean. Artxiboko argazkia: Irekia.
Euskadiko sei lan eskaintzatik bat manufaktura industriatik dator. Industria horrek 178 lan eskaintza sortu zituen joan den hilabetean Euskadin, hau da, enplegu bulegoetan erregistratutakoen % 15,6.
Zerrendan bigarren kokatzen dira osasun-jarduerak, hileko eskaintza guztien % 10,7a baitira, Lanbideren datuen arabera.
Ekainari dagokionez, ia lan eskaintza guztiak jaitsi ziren. Termino absolutuetan gehien jaitsi ziren eskaintzak manufaktura industriakoak izan ziren; % 58,8ko jaitsiera izan zuten. Termino erlatiboetan, bestalde, beherakadarik handiena arte jardueren eskaintzetan izan zen, % 82,6ko jaitsiera portzentualarekin.
Gora egin duen alor bakarra eraikuntza da.
Urtetik urterako saldoari dagokionez, termino absolutuetan administrazio publikoko eskaintzek izan dute bilakaerarik onena (% 138,4ko igoera), eta bilakaera okerrena izan duten eskaintzak artistikoak dira (% 65ko beherakada).
2022ko uztailean, Euskal Autonomia Erkidegoko enplegu-bulegoetan 1.138 eskaintza erregistratu ziren; hau da, ekainean baino 1.063 gutxiago, eta 2021eko uztailean baino 206 gehiago.
Bestalde, erregistratutako eskaintzen % 30 mugagabeak izan dira, eskaintzen % 69,6 aldi baterakoak, eta gainontzeko % 0,4 merkataritzakoak.