LAN GATAZKA
LABek "arrakastatzat" jo du Amazoneko greba, multinazionalak 60.000 pakete banatu ezin izan dituelako
EITB Media
Sindikatu abertzaleak adierazi duenez, "grebaren arrakastaren eta jarraipen handiaren aurrean, Amazonen eta Eusko Jaurlaritzaren (EAJ eta PSOE) erantzuna betikoa izan da: Ertzaintza grebarekin bat egin duten langileak zapaltzera bidaltzea".
Amazoneko langileak Trapagarango zentro logistikoaren aurrean. Artxiboko argazkia: @LABsindikatua
LAB sindikatuak adierazi duenez, bigarren egunez jarraian, Amazonek Trapagaranen (Bizkaia) dituen instalazioetan deitutako grebak "arrakasta handia" izan du, eta "ezin izan baititu banatu Gabonetan banatzeko asmoa zituen 60.000 paketeak".
LABek ohar batean adierazi duenez, "grebaren arrakastaren eta jarraipen handiaren aurrean, Amazonen eta Eusko Jaurlaritzaren (EAJ eta PSOE) erantzuna betikoa izan da: Ertzaintza grebarekin bat egin duten langileak zapaltzera bidaltzea".
Salatu duenez, Ertzaintzak "neurriz kanpo kargatu du, borren eta bultzaden bidez, parean hiru grebalari min hartuta utzita, larrialdietara joan behar izan baitute".
Ertzaintzaren kolpeen ondorioz hiru zauritu gaur Amazoneko greba egunean:#borrokasindikalaaurrera #AmazonBorrokan https://t.co/I2GE8xBhh7 https://t.co/kblzEb7cPe
— LAB SINDIKATUA (@LABsindikatua) December 23, 2022
Bestalde, Segurtasun Sailak azaldu duenez, pikete bateko kideak ziren 40 bat pertsonak furgonetei Amazoneko banaketa-zentrora sartzea galarazten zieten. Horietako batzuk polizia-hesia gainditzen saiatu dira, eta identifikatu egin dituzte.
ELAk ere bat egin du LABek deitutako grebarekin, lan baldintza duinen alde. Gaurkoarekin lau dira azken hilabeteetan egin dituzten greba egunak. LABek ohar batean nabarmendu duenez, urriaren 17ko lanuztea eta azaroaren 28ko greba arrakastatsuak izan ziren, eta sare sozialetan argitaratu dutenez, hala izaten ari dira atzoko eta gaurko jardunaldiak ere.
Grebalariek asanblada burutu dute gaurko estrategia denen artean erabakitzeko.
— LAB Ezkerraldea (@LEzkerraldea) December 23, 2022
Gaur ere produkzioa eten dute eta ez dira atera behar ziren paketeak aterako. #AmazonBorrokan
Amazon greban!! pic.twitter.com/hdUbsnvRRD
LABek salatu duenez, langileei aplikatzen zaien lan hitzarmena "ez da inola ere egokitzen beren lanaren ezaugarrietara". Gaur egun, Bizkaiko errepide bidezko salgaien garraioaren sektoreko hitzarmena aplikatzen zaie langileei. Gainera, Trapagarango zentro logistikoan aritzen diren azpikontratatutako 300 banatzaile baino gehiagori Estatuko Mezularitza Hitzarmen Kolektiboa aplikatzen zaie. Greban dauden langileek hitzarmen propioa eskatzen dute, soldatak berrikustea, lan txandak eta lanaldiak berrantolatzea, lanbide kategoriak egokitzea eta abar.
Sindikatuak adierazi duenez, lan prekarietatea nagusi da Amazonen Trapagarango zentroan, eta gaixoaldiak "ugariak eta iraupen luzekoak" dira, eta aldi baterako laneko enpresen bitartez betetzen dira. Gaineratu duenez, aplikazioen bidez langileak kontrolatzeak estres maila eta, ondorioz, lan istripuak areagotzen ditu, eta langileak muga-mugan lan egitera behartzen ditu.
ELAk, bere aldetik, bat egin du Amazoneko langileen borrokarekin, eta grebara batu daitezen animatu ditu.