Lan gatazka
Justiziako funtzionarioek greba mugagabea hasi dute, soldata hobekuntzak aldarrikatzeko
Agentziak | EITB Media
Euskal Justizia Administrazioko langileek hiru orduko geldialdia egingo dute egunero goizez, 10:00etatik 13:00etara. Bi deialdiren barruan egingo dituzte lanuzteak, bata estatu mailakoa eta bestea tokikoa, soldata igoera "duina" eta "soldata diskriminazioaren amaiera" eskatzeko, hurrenez hurren.
Your browser doesn’t support HTML5 video
Justizia Administrazioko lanuzte partzialen lehen eguna % 60ko batez besteko jarraipenarekin amaitu da EAEn, CCOOko iturriek jakitera eman dutenez. Bestalde, ELAren hitzetan, jarraipena % 60tik gorakoa izan dela Donostian, % 50ekoa Bilbon eta % 30ekoa Gasteizen.
Eusko Jaurlaritzako Justizia Sailaren arabera, aldiz, gaur lan egin behar zuten 1.862 funtzionarioetatik (guztira 2.400 langile) 436 grebara batu dira, hau da, % 23,4. Greba egin dutenak 240 (% 22,9) izan dira Bizkaian, 128 (% 25,2) Gipuzkoan eta 68 (% 22) Araban.
Euskal Autonomia Erkidegoko Justizia Administrazioko 2.500 langile daude deituta gaurtik aurrera lanuzte mugagabeak egitera, soldatak hobetzea aldarrikatzeko; batetik, CCOO eta CSIF sindikatuen estatu mailako deialdi batean, eta, bestetik, ELAk eta LABek egindako deialdi propioan.
Lehenengoek, estatu mailako deialdiaren barruan, Justizia Administrazioko 45.000 funtzionarioei deitu diete lanuzte partzialak egitera, 10:00etatik 13:00etara, egunero, modu mugagabean, astelehen honetatik aurrera, baita lanaldi osoko greba bat eta "manifestazio handi bat" ere, Madrilen, apirilaren 19an.
Deitzaileek soldata igoera "duina" eskatzen dute, eta Antolaketaren Efizientziari buruzko Lege Organikoaren (LOEO) izapide parlamentarioa geldiaraztea.
ELAk eta LABek ere egunero hiru orduko lanuzteak deitu dituzte (10:00etan hasita) gaurtik aurrera, maiatzaren 2ra arte, eta egun osoko greba apirilaren 19an, Eusko Jaurlaritzak uko egin diolako funtzionario horien soldata eta erretiro baldintzak Euskal Autonomia Erkidegoko Administrazio Orokorreko langileen baldintzekin parekatzeari.
Ohar baten bidez azaldu zutenez, "soldata diskriminazioak" % 13 inguruko aldea dakar urteko soldatan talde baten eta bestearen artean. "Aldarrikapen historikoa da, eta Eusko Jaurlaritzak ez dio erantzun positiborik eman duela hamarkada bat baino gehiagotik", deitoratu dute.
ELAk eta LABek ordainsari osagarria ere eskatu dute genero indarkeriaren epaitegietako langileentzat, eta lanpostuak baloratzeko prozesua gauzatzeko.