Bankua
Kutxabankek eta Laboral Kutxak 250,2 eta 109,7 milioiko etekin garbiekin itxi dute lehen seihilekoa
Agentziak | EITB Media
Datuak %53,4 eta %68,8 hazi dira, hurrenez hurren, iazko hilabete berarekin alderatuta.
Kutxabanken egoitza soziala, Bilbon. Artxiboko argazkia: EFE
Kutxabank Taldeak 250,2 milioi euroko irabazi garbiarekin itxi du 2023ko lehen seihilekoa, 2022ko hilabete berean baino % 53,4 gehiago. Laboral Kutxak, berriz, 109,7 milioiko irabazi garbia izan du, iazko aldi berean baino % 68,8 gehiago.
Kutxabanken emaitzak, era berean, % 26,8ko hazkundea dakar pandemiaren aurreko sei hileko emaitzaren aldean.
Finantza erakundeak adierazi duenez, "ziurgabetasun ekonomikoa gorabehera, BPGren hazkunde aurreikuspenak hobetu dira eta prezioen gorakadari eutsi zaio, azpiko inflazioak altu jarraitzen duen arren", eta testuinguru horretan lortu dute aipatutako zifra.
Bestalde, Laboral Kutxak ohar batean azaldu duenaren arabera, bere datuak interes tasen goranzko bilakaeraren "eragin positiboaren" eta balantzean dauden aktiboen "kreditu sendotasunaren" ondorio dira, hipoteka saldoak % 1 hazi baitira eta, kontsumo saldoak, berriz, % 5,4 urtarriletik ekainera.
Erakundeak gaineratu duenez, emaitza horiekin, bere merkatuko erakunde "kaudimendunena" izaten jarraitzen du, % 22,40ko CET1 ratioarekin.