FACUAk BBK Live jaialdiaren enpresa antolatzailea salatu du, bertaratutakoen eskubideak urratzeagatik

FACUA kontsumitzaileen elkarteak Bilboko Udalaren eta Kontsumobideren aurrean salatu du Bilbao BBK Live jaialdia antolatzen duen enpresa, Lastur Bookin SL, kanpoko janariarekin edo edariarekin sartzea debekatzeagatik eta eskudirutan ordaintzea eragozteagatik.

Kontsumitzaileen elkarteak bi agiritan jakinarazi duenez, uztailaren 6tik 8ra Bilboko Kobetamendin egin zen jaialdira bertaratu zirenen kexei erantzun ondoren, FACUAk egiaztatu du ekitaldia antolatu zuen enpresak, besteak beste, esparrutik kanpo erositako janariak eta edariak kontsumitzeko debekua ezarri zuela.

Jaialdian zehar, antolatzaileak urratu egin zuen erabiltzaileek eremura kanpoko janariarekin eta edariarekin sartzeko zuten eskubidea; izan ere, ekitaldiaren jarduera nagusia ez da ostalaritza, baizik eta musika-ikuskizun bat eskaintzea, FACUAk azaldu duenez.

Elkartearen ahotan, "egoera are larriagoa da esparruaren barruan elikagaiak eta edariak prezio altuetan eros daitezkeelako".

Bestalde, FACUAren hitzetan, enpresak cashless eskumuturreko bidez ordaintzeko sistema ezarri zuen jaialdiaren eremuan ordainketak egiteko modu bakar gisa, eta hori ere ordainketak eskudirutan egiteko aukera aitortzen duen legearen "aurka" doa, erantsi duenez.

Eremuan ordainketak egiteko modu bakarra (cashless eskumuturrekoaren bidez) ezartzeak kontsumitzaileen eskubideak babesten dituzten hainbat lege, Kode Zibila eta Euskadiko Kontsumitzaileen eta Erabiltzaileen Estatutuaren Legea urratzen ditu.

Elkarteak nabarmendu duenez, eskudirutan ordaintzea legezkoa da, eta, beraz, ezarritako murrizketek modu negatiboan eragiten diete kontsumitzaileei.