Ardoa
Jaurlaritzak Ministerioari bidali dio Errioxa jatorri izenaren estatutu aldaketa baliogabetzeko errekerimendua
EITB Media
Jaurlaritzak aurreko asteko Gobernu Kontseiluan onartu zuen Ministerioari errekerimendu hori egitea, eta, eskaera atzera botaz gero, dagozkion helegitea jartzeko baimena eman zuen. Hiru sailburu sozialistak erabakiaren aurka agertu ziren.
Mahastiak Lantziegon (Arabako Errioxa). Argazkia: Miguel Angel Lopez de la Calle
Olatz Garamendi Autogobernuko sailburuak Nekazaritza Ministerioari errekerimendu bat bidali dio gaur, Errioxa Jatorri Deitura Kalifikatuaren (JDK) Kontseilu Arautzailearen estatutuak aldatzen dituen ebazpena baliogabetu, ezeztatu edo indargabetzeko, "lehiaren ikuspegitik murrizketak" direla iritzita.
Eusko Jaurlaritzak iragan asteko Gobernu Kontseiluan Ministerioari errekerimendu hori egitea onartu zuen, eta, eskaera atzera botaz gero, dagozkion administrazioarekiko auzi-errekurtsoak jartzeko baimena eman zuen, Jaurlaritzak berak ohar batean gogorarazi duenez. Hala ere, hiru sailburu sozialistak erabakiaren aurka agertu ziren.
Gobernantza Publiko eta Autogobernu Sailaren ustez, bi xedapenak zuzenbidearen aurkakoak dira, eta esklusibotasuna ezartzen dute Errioxako JDKan inskribatutako mahastien ekoizpenean. Horrek esan nahi du "Errioxako JDKko Mahastien Erregistroan inskribatutako mahastietan lortutako mahats guztia ardo babestuak egiteko soilik erabili behar dela".
Jaurlaritzaren ustez, aldaketa horiekin "sektoreko operadore edo ekoizleek beren mahastietan ekoitzitako mahatsaren zati bat jatorrizko deitura berrietara edo Errioxa Deituratik kanpo ekoitzitako ardoetara bideratzea eragozten da".
Eusko Jaurlaritzaren Zerbitzu Juridikoen ustez, horrela, "Errioxa Deituratik kanpoko beste ardo batzuk egiteko eta merkaturatzeko mahatsa erabili nahi duten bazkideei oztopoak jartzen zaizkie".
Jaurlaritzaren ustez, "lehiaren ikuspegitik neurri murriztailea da" eta "sektoreari kalte egiten dio".
Gainera, JDKan egindako aldaketek "enpresa-askatasunaren eskubidearen mugatzen dute, mahastizainak (mahatsondoa landatzen dutenak) beren ardoa soilik Errioxa Deituran erabiltzera behartzen baitira".
Gobernantza Publiko eta Autogobernu Sailaren hitzetan, "mahastizainen eta ardogileen arteko diskriminazioa" dakar; izan ere, "lehenengoei beren mahatsa ekoiztera behartzen zaie, Errioxako JDKra bakarrik bideratzeko, eta ardo-korporazioek, bereziki handiek, ostera, hainbat jatorrizko deituratan lan egin dezakete".