Santanderri zigorra berretsi diote, zorra kitatu ondoren bi pertsona berankorren zerrendetan sartzeagatik

Bizkaiko Probintzia Auzitegiko laugarren atalak berretsi egin du Bilboko epaitegi baten ebazpena, Banco Santander eta Intrum Holding Spain SAU bi pertsonari 12.000 euroko kalte-ordaina ematera zigortu zituena, zorra kitatu ondoren berankorren hainbat fitxategitan sartzeagatik, EAEko Auzitegi Nagusiak ohar batean jakitera eman duenez.

Bizkaiko Auzitegiak, Bilboko Lehen Auzialdiko 11 zk.ko Epaitegiak bezala, uste duenez, banketxea eta zorra kudeatzeko konpainia bi pertsona horien "ohorean modu bidegabean" sartu ziren, eta atzera bota du Banco Santanderrek jarritako helegitea. Auzitegi Gorenaren aurrean errekurtsoa aurkezteko aukera dute aldeek.

Lehen auzialdiko epaitegiak Santander Bankua eta Intrum Holding Spain SAU zigortu zituen 2023ko urtarrilaren 22an, kaltetuetako bati 5.000 euroko kalte-ordaina eta besteari 1.000 eurokoa ematera, interes eta guzti, bi kasuetan.

Orduan frogatutzat jotako gertakarien arabera, kaltetuek abal-emaile gisa esku hartu zuten beste pertsona batzuekin batera, Banco Santanderrek 2009an sustatzaile bati emandako hipoteka-mailegu batean.

Geroago, 2012ko urriaren 10ean, akordio bat lortu zuten entitatearekin, eta, horren bidez, zenbateko jakin bat ordainduz, Santanderrek hipoteka "osorik eta erabat" kitatu zuen. Hala ere, 2014ko otsailaren 7an, kaltetuek banketxearen jakinarazpen bat jaso zuten, zorraren zenbateko jakin bat ordaintzeko eskatzen zuena, eta ohartarazi, hala egin ezean, berankortasuna kontrolatzeko fitxategiei lagako zizkiela datuak.

Kaltetuak bankuarekin harremanetan jarri ziren zorra kitatuta zegoela adierazteko, baina 2020ra arte Intrum Holding Spain SAUren ordainketa-erreklamazioak jaso dituzte, eta horien datuak berankorren fitxategietan sartuta egon dira zorra kitatu ondoren.