Sindikatuek abenduaren 19ko grebari eutsi diote, gaurko bileran Jaurlaritzarekin jarrerak ezin hurbildu ostean

Sindikatuek Eusko Jaurlaritzari leporatu diote langile publikoen lan-baldintzei buruzko "orokortasunez" hitz egitea eta "negoziatzeko ustezko borondatearen kontra" doazen neurriak hartzea. Hala, sindikatuek abenduaren 19an grebari eusteko borondatea berretsi dute.

Gaur bildu da Funtzio Publikoaren Mahai Orokorra, joan den urriaren 25eko greba egunaren ostean egindako lehen batzarrean. Bilera baino lehen, elkarretaratzea egin dute Jaurlaritzaren egoitzaren aurrean, Gasteizen.

Hitzorduaren ostean, sei sindikatuek (ELA, LAB, CCOO, Steilas, Satse eta ESK) agiri bat kaleratu dute, eta Jaurlaritzak bere planteamenduak errefusatu dituela adierazi dute, nahiz eta herritarrek aldarrikapen horiek "modu masiboan babestu" zituzten aipatutako lanuzte egunean.

Grebaren ostean Eusko Jaurlaritza negoziatzeko prest agertu zela gogorarazi dute, baina gaur berriro erakutsi du "negoziazioa Enplegu Publikoaren Legeak ezarritako joko-zelaira mugatu nahi duela, nahiz eta sindikatu guztiek baztertu".

Exekutiboak langile guztiei erretiro partzial aurreratua ezartzeari uko egitea kritikatu dute: "Akordioetan aitortutako erretiro-sariak aplikatu gabe jarraitzen du" eta Itzarri BGAEaren murrizketari eusten dio.

Gainera, deitoratu dute behin-behinekotasun tasa % 40tik gora "iraunarazten" duten erabakiak hartzen jarraitzea, eta "Madrildik inposatutako" birjarpen tasak onartzen jarraitzea.

Soldatei dagokienez, sei sindikatuek esan dute Gobernuak adierazi diela ordainsari-sistema aldakor bat garatu nahi duela, eta sistema horrek plantillaren erdia, aldi baterako langileak, kanpoan utz ditzakeela, "helburu bakar batekin: langile publiko guztiei galdutako erosteko ahalmena berreskuratzea helburu duen soldata-igoerari ez ekitea".