Euskadik Hasierako Lanbide Heziketako eredu berria izango du 2024-2025 ikasturtetik aurrera

Jokin Bildarratz Hezkuntza sailburuak, Jorge Arevalo Lanbide Heziketako sailburuordearekin batera, Hasierako Lanbide Heziketaren eredu berria aurkeztu du ostiral honetan Gasteizko Mendizabala Lanbide Heziketako Ikastetxe Integratuko Automobilgintzako Elektromekanika tailerrean. Hezkuntza Sailak diseinatu du, eta 2024-2025 ikasturtetik aurrera jarriko da abian Lanbide Heziketako euskal sisteman.

Prestakuntza-eredu malguagoa, egokituagoa, irekiagoa, eskuragarriagoa eta efizienteagoa da, eta gizarte-kohesioa du zutabe garrantzitsuenetako bat. Hasierako Lanbide Heziketaren helburu nagusia ikasleek ikasten jarraitzea da, prestakuntza jasotzen jarraitzea, baita titulazio bat lortu ondoren ere.

Gizarte-kohesioa eta gizartearen ongizatea lortzeko, beharrezkoa da biztanle trebe, kualifikatu eta integratu ugari egotea, sozialki eta profesionalki. Horregatik, Hasierako Lanbide Heziketaren hainbat kolektibo ditu jomugan: trebetasunak, abilezia eta gaitasun praktikoak dituzten ikasleak, ikasteko zailtasunak dituztenak, dibertsitate funtzionala dutenak, titulaziorik ez dutenak eta lan-esperientzia dutenak, langabezian dauden eta titulurik ez dutenak, prestakuntza egiaztatuta duten migratzaileak eta prestakuntzarik ez dutenak.

Gainera, horien beharrei erantzuteko bide ugari diseinatu dituzte: ikaskuntza-bide integratuak, ikaskuntza-bide egokituak, profesionalizatzaileak, hezkuntza-errefortzukoak eta ikaskuntza-bide malguak.

Ikasketa horien amaieran, ikasleek bi titulazio lortuko dituzte (Derrigorrezko Bigarren Hezkuntzako titulua eta Oinarrizko Graduko titulua, eta ibilbide integratua egiten badute, baita erdi-mailakoa ere), lanbide-ziurtagiriaz gain.