Amiantoa
Amiantoagatik hildako Navaleko langile baten heriotzaren jatorri profesionala aitortu du Gizarte Segurantzak
Agentziak | EITB Media
Gizarte Segurantzaren Bizkaiko Institutuak alarguntasun pentsioa handituko dio 2022an hildako langilearen alargunari, eta, horrez gain, kalte ordaina jasotzeko aukera izango du.
Naval ontziola, Sestaon, artxiboko irudi batean. Argazkia: EFE
Gizarte Segurantzaren Bizkaiko Institutuak amiantoak kutsatutako Navaleko langile baten heriotzaren jatorri profesionala aitortu du, CCOO sindikatuak ohar bidez jakinarazi duenez.
Gauzak horrela, alarguntasun pentsioa handituko diote 2022an hildako langilearen alargunari, eta, horrez gain, kalte ordaina jasotzeko aukera izango du.
Naval ontziolan aritu zen lanean 13 urte zituenetik, lehenengo Astilleros Españoles S.A. enpresan eta gero Izar Construcciones Navales deiturikoan. 2022ko otsailean hil zen amiantoak eragindako biriketako minbiziaren ondorioz.
Gizarte Segurantzaren azken ebazpen horren ondotik, CCOOk amiantoaren eraginpean lan egin zuten pertsonei sindikatura joateko deia egin die, erretiroa edo alarguntasun prestazioetan egon daitezkeen igoerak izapidetzeko.