Akordioa lortu dute Siemens Gamesa Arazurin, hilabete eta erdiko greba mugagabearen ostean

Siemens Gamesa Arazuriren langile batzordeak (CCOOko eta CGTko bina ordezkarik eta ELAko 1ek osatzen dute) akordioa sinatu du zuzendaritzarekin bi hilabeteko mobilizazioen ostean, eta Siemens Gamesa Sarrigurenen bulegoetako lan-hitzarmenean jasotzen diren hobekuntza guztiak jasoko dituzte Arazuriko langileek.

Gainera, CCOOk ohar batean azaldu duenez, igo egingo dituzte soldata baxuenak, malgutasuna hobetuko da, kaleratze kolektiboei aurre egiteko formulak adostu dira, eta 2023tik ahaztuta zeuden kategoria igoerak egingo dituzte.

Siemens Gamesa Arazuriko langileak urtarrilaren 22an hasi ziren mobilizazioekin, eta aldi baterako lanuzteekin hasi baziren ere, greba mugagabeari ekin zioten otsailaren 5ean.

Akordioan jasotako hobekuntzen artean KPI igoerak ere badaude: % 4,8koa 2023an eta % 3,75ekoa 2024an, 2025ean eta 2026an. Gainera, 2023ko KPI berritu aurretik, 2022ko soldaten % 1aren ordainketa egingo zaie langileei.

CCOOren ustez, Arazuriko ia langile guztiek (70 laguneko plantilla) babestutako grebak eta mobilizazioek desblokeatu dute lan-hitzarmenaren negoziazioa eta lortu dute konpainiako gainerako langileen lan-baldintzetara gerturatzea ekarriko duen akordioa.