EUSTAT
EAEko BPGa % 0,5 hazi zen 2024ko lehen hiruhilekoan
EITB MEDIA
2023ko lehen hiruhilekoarekin alderatuta, BPGren hazkundea % 1,6koa izan da. Datorren ekainaren 7an, Eustatek BPGaren eta enpleguaren zenbatespen banakatuak argitaratuko ditu.
Barne Produktu Gordinaren bilakaera EAEn. Grafikoa: EiTB Media
Euskal Autonomia Erkidegoko (EAE) ekonomia % 0,5 hazi zen 2024ko lehen hiruhilekoan, aurreko hiruhilekoarekin alderatuta, eta % 1,6, berriz, 2023ko lehen hiruhilekoarekin alderatuta, Eustat Euskal Estatistika Erakundeak astearte honetan argitaratutako datuen arabera.
Aurrerapen hori egiteko unean eskura dagoen koiunturazko informazio ekonomikoaren arabera, urteko lehen hiruhileko honetan EAEko ekonomian ikusitako urte arteko hazkundea zerbitzuen sektorearen bilakaeran oinarritzen da nagusiki.
Enplegua ere, lanaldi osoko baliokidetzako lanpostu gisa neurtuta, % 0,5 igo da 2024ko lehen hiruhilekoan, aurreko hiruhilekoarekin alderatuta. Aurreko urteko hiruhileko beraren aldean, % 2,0ko hazkundea zenbatetsi zen.
Datorren ekainaren 7an, Eustatek BPGren eta enpleguaren zenbatespen bereiziak argitaratuko ditu 2024ko lehen hiruhilekoko Hiruhileroko Kontuetan; izan ere, hori egiteko unean eskuragarri ez zegoen koiunturazko informazio ekonomikoa txertatu ahal izango du.