Emakume bat hil da Egilatzen behi batzuen kolpeak jasota

60 urteko emakume bat hil da Donemiliaga udalerriko Egilatz kontzejuan (Araba) dagoen abeltzaintza etxalde batean, behi batzuen kolpeen ondorioz. Haren semea, 25 urtekoa, ere zauritu dute, eta Txagorritxuko Ospitalera eraman dute.

Eusko Jaurlaritzako Segurtasun Sailaren arabera, gertakariak ostiral eguerdian jazo dira, 12:00ak aldera, eta heriotza lan-istripuz gertatu omen da.

Osasun-langileak bertaratu dira, baina politraumatismoak zituen emakumearen heriotza egiaztatu baino ezin izan dute egin.

Bertakoek Euskadi Irratiari jakinarazi diotenez, ama-semeak bizilagunen etxaldera joan dira laguntzera, "beste askotan bezala"; izan ere, Erika Letamendia alkatearen hitzetan, auzolana oso ohikoa da inguru horretan.