Gaixotasun profesionala
CAFek 43.646 euro ordaindu beharko dizkio langile ohi bati amiantoak eragindako gaixotasun batengatik
agentziak | eitb media
Gizonak amiantoaren eraginpean lan egin zuen legeak agintzen zuen "arnasketa babesik eta osasun zaintza espezifikorik gabe".
CAFeko langileen manifestazioa amiantoaren biktimen alde, Beasainen. Argazkia: EITB
Donostiako Sozialeko 3. Auzitegiak onartu egin du hein batean CAFeko 94 urteko langile ohi baten salaketa, eta enpresak 43.646 euro eman beharko dizkio asbestosi gaixotasun profesionalagatik.
1964tik 1994ra lan egin zuen gizonak Beasaingo CAFeko fundizioan, amiantoaren eraginpean eta legeak agintzen zuen "arnasketa babesik eta osasun zaintza espezifikorik gabe", Asviamie Euskadiko Amiantoaren Biktimen Elkarteak jakinarazi duenez.
Osalanek 2022ko ekainaren 21ean Amiantoaren Eraginpean lan egindako Langileen Zerrendan sartu ostean, Zumarragako Ospitalean egin zioten diagnosia, eta Gizarte Segurantzak Erabateko Ezgaitasun Iraunkorra eman eta 142.897 euroko kalte-ordaina eskatu zion CAFi.
Enpresak erantzun zuen arnasketa arazoak bere adinagatik direla, 94 urte dituelako, eta bestela ere, lesio arina dela eta 13,779 euroko kalte-ordaina dagokiola, azaldu du Asviamiek.
Ebazpenean agertzen denez, enpresak "hein batean" onartu du salaketa, egiaztatutzat ematen da gaixotasunaren jatorria, eta kalte-ordainera behartzen du, baina aitortzen du "zaila" dela zehaztea zenbaterainokoa den gaixotasunaren eragina eta zenbaterainokoa adinarena.
Horregatik, epaileak "arin-moderatu" gisa sailkatu du gaixotasuna, eta 43.646 euroko kalte-ordaina ematera zigortu du CAF.
Asviamiek Osalanen zerrendan sartzeko eskaera egiteko deia egin die amiantoaren eraginpean aritu diren langile guztiei, osasun arreta berezia eta diagnosi egokia lortzeko.