Erreforma fiskala
Bilbaok dirudunen zergak igotzea proposatu du
Erredakzioa
Bizkaiko ahaldun nagusiak % 8 arteko murrizketa egingo du gastuetan, diru-bilketaren jaitsiera orekatzeko.
Jose Luis Bilbao Bizkaiko ahaldun nagusia. Argazkia: EITB
Bizkaiko Aldundiak % 6-8 murriztuko ditu gastuak, diru-bilketaren jaitsiera orekatzeko, Jose Luis Bilbao ahaldun nagusiak iragarri duenez.
Lurraldeko politika orokorreko eztabaidan eskainitako hitzaldian, diru-sarrerek aurrez ikusitakoaren % 92-94 baino ez dutela beteko ohartarazi du Bilbaok. Horrenbestez, "tamaina berdineko" murrizketak egin beharko dituzte, "urtea zenbaki negatibotan ez ixteko".
Ahaldun nagusiaren esanetan, "hurrengo egunetan" zehaztuko ditu "Aurrekontuak diru-sarreren errealitatera egokitzeko neurriak".
Halaber, 2013ko Aurrekontuak "zorrotzak" izango direla aurreratu du, eta zerga sistema erreformatzea proposatu du. Horren ildotik, soldata handienei tasak igotzea eta Elkarteen gaineko Zergaren kenkariak murriztea proposatu du.