Gasteizen AHTa lurperatzeko lanek aurrera egin dute bost urtez blokeatuta egon ostean

Abiadura handiko trenaren (AHT) Gasteizko sarrera eta irteerako proiektuaren txostena onartu du bart Espainiako Gobernuko Garraio eta Mugikortasun Ministerioak. Horrekin batera, argi berdea eman die lur azpiko geltoki berria eraikitzeko lanei.

11.000 alegazio jaso ditu bost urtean egitasmoak, eta horiek guztiak aztertu ostean iritsi da onespena. Hain zuzen ere, obra horiek Salburua inguruan izan dezaketen ingurumen-inpaktuarekin lotuta aurkeztu dituzte alegazio gehienak. 

Lurralde Plangintza, Etxebizitza eta Garraio Sailak gogora ekarri du Ministerioak eman beharreko pauso bat zela aipatutakoa, martxoan ingurumen inpaktuaren gaineko deklarazioa onartu ondotik.

Behin baimen hori lortuta, Arkautiko lotunearen afera zehaztea falta da. Handik izango ditu AHTak Euskadiko gainerako hiriburuekin loturak, eta baita frantziar Estatuarekin ere.

Atzo sinatutako txostenean ez dute ezer berririk jaso. Hau da, AHTa 3,6 kilometroko tunel batetik iritsiko da Gasteizera. Tunel horrek Salburua eta Pedro Asua kalea lotuko ditu.

Geltoki berriak bi solairu eta 400 ibilgailurentzako aparkalekua izango ditu lur azpian.

Garmendia: "Gobernua tramiteak azkartzen ari da"

Espainiako Gobernuak Euskadin duen ordezkari Marisol Garmendiak esan du "jakitun" direla abiadura handiko trenak duen garrantziaz, eta horregatik, "tramite guztiak azkartzen" ari direla, azpiegitura hori lehenbailehen erabilgarri egon dadin.

Arriolak nabarmendu du azterlanaren onarpena "inflexio puntu bat" dela 

Iñaki Arriola jarduneko Lurralde Plangintza, Etxebizitza eta Garraio sailburuak positibotzat jo du Garraio eta Mugikortasun Iraunkorreko Ministerioak Gasteizko trenbidea lurperatzeari eta Arkautiko lotuneari buruzko behin betiko informazio azterlana onartu izana. Martxoan ingurumen-inpaktuaren adierazpena onartu ondoren, informazio azterlana onartzea espero zela adierazi du, eta "oso albiste ona" dela azpimarratu du.