MasOrange konpainiaren lan-erregulazioko espedienteak 39 kaleratze aurreikusten ditu Euskaltelen

Orange Españaren bi filialak (OSP eta OSFI) izango dira langileen ordezkariak eta MasOrange negoziatzen ari diren lan-erregulazioko espedienteen eragin handiena jasango duten sozietateak, prozesuan planteatutako 795 bajen % 69,7 bi enpresa horietako langileenak izango baitira.

CCOOk ohar bat bidali die gaur enpresako beharginei, kaleratzeen banaketa zehazteko: 521 baja izango dira Orange Españan (OSP) eta 33, berriz, Orange España Comunicaciones Fijasen (OSFI).

Gainera, aipatutako iturrien arabera, MasMovilekoak ziren sozietateetako 241 langile kaleratuko dituzte: 141 Xferan, 39 Euskaltelen, 35 RCable/Telecablen eta 26 Lorcan.

Orange España eta MasMovil enpresek duela bost hilabete bat egin ondoren sortutako enpresa da MasOrange, 8.000 langile inguruko konpainia, baina espedienteak bere sozietateetako seiri soilik eragiten die. Ondorioz, 4.600 langileen % 17ri emango diete baja.

Madril izango da eskualderik kaltetuena (bertan dago plantillaren zatirik handiena) planteatutako baja guztien % 78,87 (627 langile) bertan emango baitituzte. Euskal Autonomia Erkidegoan, berriz, Euskaltelen, 43 baja izango dira, eta Bartzelonan 35.

Galiziaren eta Asturiasen, taldeak 20 langile kaleratuko ditu RCablen eta 18 Telecablen.

Asteartean, irailaren 17an, osatu zuten negoziazio-mahaia, eta hilaren 25ean izango du hurrengo bilera. Enpresak adierazi du lan-erregulazioko espedientean "lehentasuna borondatezko bajek" izango dutela, baina horrek ez ditu sindikatuak konbentzitu.

Horrela, CCOO sindikatuak iragarri du "legezko baliabide eta bitarteko sindikal guztiekin" defendatuko dituztela lanpostu guztiak, eta, horretarako, mobilizazioak, elkarretaratzeak, lanuzteak edo grebak egingo dituztela.