EUSTAT
Euskadik biztanleko 3.882 euro bideratu zituen Osasungintzara 2023an, aurreko urtean baino % 5,4 gehiago
EITB MEDIA
Hala islatzen du Eustat Euskal Estatistika Erakundeak asteazken honetan argitaratutako txostenak. Osasun-gastuak administrazio publiko guztiek egindako gastu arrunta neurtzen du, bai eta nahitaezko eta borondatezko osasun-aseguruek eta etxe bakoitzean zuzenean egindako ordainketak ere.
Mediku baten kontsulta. Artxiboko argazkia: EITB
Osasun-gastua 8.554 milioi eurokoa izan zen 2023an Euskadin, hau da, Barne Produktu Gordinaren (BPG) % 9,2 —hau da, biztanleko 3.882 euro—; aurreko urtean baino % 5,4 gehiago. Eustat Euskal Estatistika Erakundeak asteazken honetan argitaratu duen txostenak jasotako datuak dira.
Eustatek nabarmendu duenez, osasun-gastuak osasunerako ondasunen eta zerbitzuen azken kontsumoa neurtzen du, hau da, edozein finantzatzailek egindako gastu arrunta. Gastu horren finantzaketan sartzen dira administrazio publiko guztiak, nahitaezko osasun-aseguruak, borondatezko osasun-aseguruak eta etxekoen unitateek zuzenean egindako ordainketak.
2020az geroztik, balio absolutuko gastu arruntaren guztizkoak % 5eko hazkundea izan du batez beste urtero, eta azken urtean % 6raino igo da, 2022an 8.068 milioi izatetik 2023an 8.554 milioi izateraino. BPGaren ehunekoan osasunean egindako gastu arrunta ehuneko 0,1 puntu jaitsi da azken urtean.
2023ko gastu guztietatik 5.944 milioi administrazio publikoei eta nahitaezko ordainketarako aseguruei dagozkie (2022an baino % 5,5 gehiago), eta gainerako 2.610 milioi euroak familien borondatezko ordainketarako eta zuzeneko ordainketarako osasun-aseguruei dagozkien gastuak dira (2022aren aldean % 7,1 hazi da).