Abortuaren inguruan erabateko adostasuna izatea oso zaila dela dio PPk

Jose Antonio Bermudez de Castro PPk Kongresuan duen idazkari nagusiak aitortu du abortuaren inguruan bere alderdiaren baitan erabateko adostasuna izatea "oso zaila" dela, baina Espainiako Gobernuak egindako erreformaren aurrean Alderdi Popularrak batasuna erakutsiko duela ziur agertu da.

Efen egindako elkarrizketa batean, Bermudez de Castrok esan du ez dagoela inolako arrazoirik gai honen inguruko bozketak sekretupean egiteko, PSOEk hala eskatu duen arren.

"Gai hau oso konplexua eta sentibera da eta, ondorioz, alderdiaren baitan erabateko adostasuna izatea oso zaila da, jarrera moralak, etikoak eta juridikoak nahasten direlako; baina jarrera pertsonalak eta politikoak ez dira gauza bera", azaldu du.

Abortuari buruz PPk duen jarrera "oso argia" dela gogoratu du, eta jarrera hori alderdiaren kongresuetan eta hauteskunde-programetan berretsita daudela erantsi du.

"Gure talde parlamentarioak askatasunez eta hauteskundeetan agindutakoarekin koherentzian bozkatzen du; horrenbestez, erabateko adostasuna egon ez arren, azkenean PPren jarrera nagusituko da", azpimarratu du.

Ildo horretan, ez du aurreratu nahi izan zenbait parlamentarik alderdiaren diziplina hautsi dezaketen edo ez, baina ziur agertu da Abortuaren Lege berriak aurrera egingo duela.

"Ikusteko dago behin betiko proiektua zein izango den, baina seguru PPren filosofia eta printzipioak bilduta agertuko direla", nabarmendu du.