Gallardonen erreforma
Abortuaren legea ez betetzeko eskatuko die Bilduk euskal erakundeei
Erredakzioa
Koalizioak mozioak aurkeztuko ditu Legebiltzarrean, Aldundietan eta Udaletan, erakunde horiei "abortatzea erabaki duten emakumezkoen beharrizanak" bermatzea eskatuz.
Abortuaren legea berria ez betetzeko eta, emakumezkoek "aske erabakitzeko eskubidea eta doan abortatzeko aukera" izan dezaten, "estrategiak" bilatzeko eskatuko die Bilduk euskal erakundeei.
Koalizioak mozioak aurkeztuko ditu Eusko Legebiltzarrean, EAEko Foru Aldundietan eta Udaletan, erakunde horiei "abortatzea erabaki duten emakumezkoen osasun zerbitzuak eta zerbitzu legalak eta sozialak" bermatzea eskatuz.
Onintza Enbeita Amaiurreko diputatuak, Lur Etxeberria EH Bilduko legebiltzarkideak eta Amaia Agirresarobe Bizkaiko batzarkideak agerraldia egin dute Bilbon, Gallardonen erreformari emango dioten "erantzun irmoa" aurkezteko.
Abortuaren erreforma "elite erlijioso batek" biztanleriaren erdiaren aurka agindutako araua dela salatu dute. "Emakumezkoen autonomiaren aurkako eraso larria da", gaineratu dute.
Halaber, Gallardonen erreforma Europan txalotu duten bakarrak "ultraeskuindarrak" izan direla nabarmendu dute.