Manifestazioa deitu dute, Cabacas auzia artxibatzear dagoelakoan

Iñigo Cabacasen heriotzaren kasua artxibatu egingo dutenaren susmoa dute haren senide eta lagunek.

Ertzain batek jaurtitako gomazko pilotakada batek buruan eragindako zauriaren ondorioz hil zen Athleticen jarraitzailea.

Akusazio partikularrak izapide berriak egiteko eskaera egin zuen, baina epaitegiak oraindik ez dio eskaera horri erantzun, ikerketarekin jarraitzea edo auzia ixtea abenduaren 6a baino lehen erabaki behar duenean.

Hain justu, Jone Goirizelaia abokatuak karga polizialean parte hartu zuten ertzainek berriro deklaratzeko galdegin zuen epaitegian, baina ez du inolako erantzunik jaso.

Horrenbestez, Iñigo Gogoan plataformak uste du auzia artxibatu egingo dutela, epaiketarik egin gabe.

"Auzi hau ezin daiteke itxi arduradun polizialik eta politikorik gabe. Horrela gertatuz gero, inpunitateari aurre egitea beste biderik ez dugu izango. Eta honek guztiak agerian utziko du sarritan esan duguna: elkarri babesten ari direla", salatu dute ohar batean.

Hori dela eta, Iñigo Gogoan plataformak manifestazioa deitu du datorren ostegunerako Bilbon, 'Injustizia gehiagorik ez. Inpunitateari Stop' lelopean. Duela lau urte eta erdi Ertzaintzak Iñigo Cabacas zauritu zuen tokitik abiatu eta Bilboko Epaitegietan amaituko da mobilizazioa.