Garoñako zentral nuklearra
Mobilizazio bat deituko dute martxoan, Garoñako zentralaren aurka
Agentziak | Erredakzioa
Bestalde, Segurtasun Nuklearreko Kontseiluak gutxienez beste astebetez atzeratu du zentrala berriro irekitzeko aukerari buruzko erabakia.
Garoñako zentral nuklearraren aurka Bilbon egindako protesta. Argazkia: EFE
Araba Sin Garoña elkartea konbentzituta dago Segurtasun Nuklearrerako Kontseiluak Garoñako zentral nuklearra berriro martxan jartzea erabakiko duela. Hori dela eta, martxoan mobilizazio bat antolatuko du, erabaki horren kontra.
Alberto Frias bozeramaileak agerraldia egin du, elkarte horrek Kongresuan ordezkaritza duten alderdiekin egindako bilera-sortaren xehetasunak azaltzeko eta ekimen berriak iragartzeko.
EAJrekin, Elkarrekin Podemosekin eta PSErekin bildu dira. Alderdi Popularrarekin batzartzeko aukera baztertu dute, alderdi hori “energia nuklearraren aldekoa delako”.
Friasek azaldu duenez, zentralaren jardueraren kontrako arrazoiak biltzen dituen dokumentu bat helarazi diete alderdiei eta zuzendaritzetan aztertuko dute orain. Otsailaren 15erako jasoko dute erantzuna.
Martxoan, Garoñako zentral nuklearra urteurrenean, elkarteak Arabako ehun bat pertsona ezagunek babestutako adierazpen bat argitaratuko dute. Era berean, herri-mobilizazio bat antolatuko dute, zentrala berriro irekiko dutela ziurtzat ematen dutelako.
Erabakia, atzeratuta
Bestalde, Segurtasun Nuklearreko Kontseiluak Garoñako zentralari buruzko erabakia hartzeko epea atzeratu egin du, Cristina Narbona kontseilariak hala eskatuta.
Gaurko osoko bilkuran eztabaidatu behar zuten gaia, baina kontseilariek eskubidea dute atzerapenak eskatzeko.
Gai baten eztabaida atzeratzea gehienez bi aldiz eska daiteke. Beraz, datorren asteko saioan ez bada, bi astebarruko osoko bilkuran hartu beharko dute Garoñako zentralari buruzko behin betiko erabakia.