Aburto: 'Hipokrita iruditzen zait sutea aurreikus zitekeela esatea'

Juan Mari Aburto Bilboko alkatearen ustez, Zorrotzako sutea "aurreikus zitekeela esatea hipokrisi sozial eta politikoa" da. Lau pertsona hil ziren larunbatean auzo horretako Landa eremuko etxebizitza batean izandako sutean; bost pertsona oraindik ospitalean daude.

Radio Euskadin egin dioten elkarrizketa batean adierazi duenez, Udala hainbat aldiz bildu da Zorrotzako auzo elkartearekin, eta ezagun zuen herritar horien egoera. Erre den etxebizitza "eraisteko asmoa" zegoela argitu du.

Halaber, "dolumina eta elkartasuna" adierazi nahi izan die asteburuan Zorrotzako suteko biktimen senitarteko eta lagunei. Aburtoren esanetan, "bi gazte eta bi ume hiltzen direnean, atsekabetuta geratzen gara, baina era berean, auzo horrekiko dugun konpromisoa berretsi nahi dut".

Azaldu duenez, eraikina teknikoki "kolapsatuta" geratu da, eta hortaz, zaila izango da sua zerk eragin zuen argitzea. "Ikerketa zaila izango da. Hobe dugu itxarotea", erantsi du.

Tragedia izan baino lehen, Zorrotzako auzo elkartearekin "hainbat" aldiz bildu zirela nabarmendu du Aburtok: "Esan zidaten lehen aldia zela Bilboko alkate batekin biltzen zirena, eta nik batzartzen jarraituko dut. Hipokrisi sozial eta politikoa iruditzen zait sutea aurreikus zitekeela esatea". Azaldu duenez, auzokideek argindarra izan zezaten lan egin zuen Udalak. "Etxea botatzeko asmoa zegoen, baina desjabetze bat ez da egun batetik bestera egiten", argitu du.

Zorrotzako bizilagunen eskaeren aurrean, Udalak "maila" emango duela azpimarratu du alkateak, erraza izango ez dela aitortu badu ere, "30 urte baitaramatzate horrela". Konponbide zehatza urte amaieran etor litekeela esan du Juan Mari Aburtok.

Zorrotzan ez ezik, Ollerieta eta Rekalde auzoetan ere azaroak daudela onartu du alkateak, eta "gizarte kohesioa" helburu lanean jarraituko dutela azpimarratu du.

Jatorrizko informazioa Radio Euskadik landu eta eitb.eus-ek itzuli du.

 

 

 

>